Skal du i gang med å analysera kvalitative data som du har henta inn gjennom intervju, feltarbeid eller dokumentanalyse? Har du opplevd å sitta der med side opp og side ned med transkriberte intervju og lurt på kva du skal gjera?

Du er ikkje åleine. Sjølv erfarne forskarar kan kjenna seg overvelda og usikre i møte med store mengder data. Kvar skal ein eigentleg byrja?

Kollektiv kvalitativ analyse er eit svar på det spørsmålet. Det er ein metode for å koma raskt i gang med analysearbeidet i staden for å bli sittande i uvissa. Metoden har fem trinn:

• datareduksjon

• felles gjennomgang av datamaterialet

• idemyldring

• sortering og drøfting av tema

• disposisjon og arbeidsplan

Analyse er eit handverk som du lærer best i lag med andre. Derfor er kollektiv kvalitativ analyse utvikla for å analysera datamaterialet i lag, med til dømes studentar, ph.d.-kandidatar, forskarar eller rettleiarar.