Liten fugl er ei bok, men også ei kiste full av overraskingar. På sidene finn vi menn som blir til eldfluger og kvinner som har ein liten fugl i lomma på jobbintervju, eller med eit blikk forvandlar hagearbeid til performans. Nokre av forteljingane går føre seg i Nord-Noreg, andre i Peru, og andre igjen på ikkje bestemte stader. Men uansett landskap går hovudpersonane gjennom kvardagen som om den både var deira eige territorium – og ein lett hallusinasjon. For her blir alle rom uvisse: Migrasjonen er ikkje berre geografisk, men også emosjonell og mental. I desse tekstane blandar sorg, framandkjensle, humor seg i eit undrande – nærmast magisk – blikk på verda. Slik kastar Liten fugl lys over mørke soner i tilværet og forvandlar dei til små openberringar.

Claudia Ulloa Donoso (Peru, 1979) er ein forfattar busett her i landet. Ho kom først til Nord-Noreg, tidleg på 2000-talet, budde i Bodø, studerte ved Universitetet i Tromsø, og no bur ho i Trondheim. Alt i 2006 debuterte ho, med novellesamlinga El pez que aprendió a caminar (Fisken som lærte å gå), og heldt fram i same sjanger med Séptima madrugada (2007, Sjuande morgongry) og Pajarito (Liten fugl, 2015) som allereie har oppnådd kultstatus blant spansktalande lesarar. Den første boka som kom ut på norsk, var derimot første romanen hennar, Yo maté un perro en Rumanía (2022) Jeg drepte en hund i Romania (2024). Ho har vore representert i fleire antologiar med temaet den nye latinamerikanske novella, og vart i 2017 vald ut til Bogotá39-lista over dei mest lovande unge forfattarane i Latin-Amerika. I Noreg har ho ved sida av å utvikle forfattarskapen sin undervist i spansk, og i norsk for innvandrarar.