Forteljinga i Legenden om Svein og Maria har Utstein kloster som bakgrunn. Handlinga går føre seg på Luthers tid, og etter klassiske mønster er ho delt opp i avsnitt - eitt for kvar av dei 20 kveldane boka omfattar - med samtaler mellom den tilreisande munken Morten og klosterbrørne som ramme omkring forteljinga kvar kveld. Takka vere desse rammene og kanskje særleg det avsluttande kapittelet der dei sju Utstein-munkane på kvart sitt vis prøver å fullføre den forteljinga som dei alle synest har fått ei lite fullgod avslutning, hevar legenda seg frå å vere ei rein forteljing til å bli den tidsaktuelle bodskapen som forfattaren har ønska å formidle. Legenden om Svein og Maria er andre bind i Utstein kloster-syklusen.