Kva skal til for at kvalitetsvurdering skal stimulere til organisasjonslæring på den enkelte skole? Kan kommunar og fylke bli meir solide skoleeigarar gjennom aktiv bruk av nasjonale prøver, elevundersøkingar, tilstandsrapportar og statlege tilsyn? Korleis unngår ein at kvalitetsarbeidet blir eit ritual som i liten grad fører til betre undervising og læring? Dette er sentrale spørsmål i denne boka, som rettar søkelys mot kvalitetsdiskursen både nasjonalt og internasjonalt.

Forfattaren ser på korleis leiing av kunnskapsutviklande prosessar krev førebuing, gjennomføring og oppfølging som skil seg frå tradisjonelt forvaltningsarbeid. Gjennom utvikling av systemiske samhandlingsmønster kan skolar og skoleeigarar etablere lokalt handlingsrom som styrker undervisnings- og læringsarbeidet. Samstundes kan kvalitetslogikken også auke avstanden mellom skolar, kommunalsjefar, rådmenn og politikarar.

Målgruppa for boka er fagpersonar, leiarar og studentar som arbeider med spørsmål om kvalitetsvurdering og organisasjonslæring.

Knut Roald er dosent ved Høgskolen på Vestlandet med leiing, kvalitetsarbeid og organisasjonslæring som forskingsområde Han har bakgrunn som rektor, kommunalsjef og leiar av industriverksemder. Forfattaren er knytt til masterprogram i utdanningsleiing og har fagleg ansvar for studietilbod innanfor den nasjonale rektorutdanninga.