Utandørs i nordvest

Tilfeldig? Slik kan det verke! Ein vinterdag i 2017 blei eit bord dekt av eit tjukt lag rein, kvit nysnø, - ein ypparleg damaskduk for ein skatemiddag i fjøra! Audbjørg sette bildet inn på Facebook, og det blei lagt merke til av Olla. Etter eit møte på hotell Seilet i Molde nokre dagar seinare kom eit samarbeid i stand, og bokprosjektet Utandørs i nordvest var eit faktum! Kom og bli med oss på ei reise utandørs i nordvest! I denne boka vil de sjå ulike stader til ulike årstider i Møre og Romsdal. For oss har det vore eit eventyr å dra ut i alle årets tolv månader, sommar som vinter. Det er inspirerande å møte menneske med ulike kulturutøvingar og å sjå det som særpregar fylket vårt ved kyst, langs fjord og på fjell. Vi har følt årstidene på kroppen i vind og vêr eller på solblanke dagar med varme og stille. For eit fylke vi har! Vårt håp er at mange, mange vil kose seg med å bla i denne boka fylt av foto og små tekstar, kanskje få lyst til å prøve dei enkle matrettane vi har kost oss med på desse utfluktene våre, og ikkje minst, bli inspirert til å vere utandørs i all slags vêr.